🌟നമ്മുടെ പ്രാർഥന

     ഒരു ഗുഹയിൽ അകപ്പെട്ടുപോയ മൂന്നാളുകളുടെ പ്രാർഥനയെ കുറിച്ച് നബി (സ) പറയുന്നൊരു കഥയുണ്ട് ഹദീസുകളിൽ. മൂന്നാളുകൾ ഒരിക്കൽ ഒരു യാത്ര പുറപ്പെട്ടു. വഴിമധ്യേ രാത്രിയായപ്പോൾ ഒരു ഗുഹയിൽ കയറി അവർ വിശ്രമിച്ചു. എന്നാൽ മലമുകളിൽ നിന്നും വന്ന ഒരു വലിയ പാറ അവർ പ്രവേശിച്ച ഗുഹയുടെ പ്രവേശനകവാടം അടച്ചുകളഞ്ഞു. ഒരു നിലക്കും പുറത്തുകടക്കാനാകാതെ ആ മൂന്നു യാത്രികരും വിഷമാവസ്ഥയിലായി. ആ ഗുഹയിൽ കിടന്നു മരണം തന്നെ അവർ ഉറപ്പിച്ചു.

     അപ്പപ്പോഴാണതിലൊരാൾ ഒരുപായം പറയുന്നത്. നമുക്ക് നമ്മൾ ചെയ്ത ഒരു സൽകർമം മുൻനിർത്തി അല്ലാഹുവോട് ദുആ ചെയ്യാം. അല്ലാഹു കേൾക്കാതിരിക്കില്ല. അങ്ങനെ മൂന്നുപേരും അവർ ജീവിതത്തിൽ ചെയ്ത സൽകർമങ്ങൾ എടുത്തുപറഞ്ഞു അല്ലാഹുവോട് പ്രാർഥിച്ചു. ഒന്നാമൻ പ്രാർഥിച്ചത് തന്റെ മാതാവിനോട് കാണിച്ച കരുതലും കാരുണ്യവും എടുത്തുപറഞ്ഞാണ്. രണ്ടാമനാകട്ടെ, ഒരു വലിയ തെറ്റ് ചെയ്യുന്ന ഘട്ടമെത്തിയപ്പോൾ അല്ലാഹുവെ ഭയപ്പെട്ടു അതിൽനിന്നും പിന്തിരിഞ്ഞ കാര്യം പറഞ്ഞുകൊണ്ടായിരുന്നു. മൂന്നാമൻ തന്റെ കീഴിൽ ജോലി ചെയ്ത തൊഴിലാളിയുടെ അവകാശവും അയാൾക്കവകാശപ്പെട്ട ധനവും വർഷങ്ങൾ കഴിഞ്ഞിട്ടും കാത്തുവെച്ചു അയാൾക്ക് തന്നെ തിരിച്ചേൽപിച്ചതിനെകുറിച്ച് പറഞ്ഞു കൊണ്ടായിരുന്നു.
ഓരോരുത്തരുടെയും ദുആ കഴിയുമ്പോൾ പാറക്കല്ല് കുറേശ്ശേ നീങ്ങി മൂന്നാമന്റെ പ്രാർഥന അവസാനിച്ചപ്പോൾ പൂർണമായും ഗുഹാമുഖം തുറന്നുകിട്ടിയെന്നുമാണ്.

     നമ്മുടെയൊക്കെ പ്രാർഥനയുടെ സ്വഭാവം എന്താകണമെന്നും വിശ്വാസിയുടെ ജീവിതത്തിന്റെ സാമൂഹ്യതലവും വളരെയേറെ മനോഹരമായി അവതരിപ്പിക്കുന്നൊരു കഥയാണ് മുത്ത് നബി നമ്മെ പഠിപ്പിക്കുന്നത്. *ജീവിതത്തിൽ ഒരു സൽകർമവും എണ്ണിപ്പറയാനില്ലാത്തയാളുടെ അവസ്ഥയെ കുറിച്ചൊന്നാലോചിച്ചു നോക്കൂ.*

      മാതാവിന് കൊടുക്കേണ്ട പരിചരണവും കരുതലും കരുണയുമാണ് ഒന്നാമന്റെ പ്രാർഥനയെങ്കിൽ അത് കുടുംബ ബന്ധത്തിൽ ഓരോ വിശ്വാസിയും പാലിക്കേണ്ട ജീവശാസ്ത്രത്തിന്റെ നേർരേഖയാണ്. കുടുംബബന്ധത്തിൽ ഒരു കരുതലും കരുണയും സ്‌നേഹവും ഇല്ലാത്തവൻ എത്ര കയ്യുയർത്തിയാലും പടച്ച തമ്പുരാൻ എങ്ങനെ കേൾക്കാനാണ്.

       രണ്ടാമന്റെ പ്രാർഥനയുടെ മർമം അവിടെയാണ്. തെറ്റ് ചെയ്യാനുള്ള എല്ലാ സഹചര്യങ്ങളും ഒത്തുവരികയും അതിലേക്ക് മുഴുകാൻ പുറപ്പെടുകയും ചെയ്യുന്ന ശാരീരിക സുഖത്തിന്റെ സമയത്താണ് അല്ലാഹുവിനെ കുറിച്ചോർമവരുന്നതും അതോടെ പശ്ചാതപിച്ചു തെറ്റിൽ നിന്നും ഓടിമാറുന്നതും.

       *സാഹചര്യം തെറ്റുകൾ ചെയ്യാൻ മനുഷ്യനെ പ്രേരിപ്പിക്കുന്നു. തെറ്റുകളിലുള്ള കുറ്റബോധമില്ലായ്മയും തെറ്റുകളിൽ നിന്നും വിട്ടുനിൽക്കാനുള്ള മാനസിക ശുദ്ധിയുമില്ലാത്തവൻ യാതൊരു കുറ്റബോധവുമില്ലാതെ തെറ്റുകൾ ചെയ്തു കൊണ്ടേയിരിക്കെ പ്രാർഥിക്കുമ്പോൾ പിന്നെങ്ങനെയാണ് നാഥൻ ഉത്തരം നൽകുക!*

     മൂന്നാമത്തേത് സാമൂഹ്യ കടമയും അവകാശ സംരക്ഷണവുമായി ബന്ധപ്പെട്ടതാണ്. *അന്യർക്കവകാശപ്പെട്ട സമ്പത്തും അവകാശങ്ങളും പിടിച്ചുവെച്ചും ഹറാമായ സമ്പാദ്യം ഉപയോഗപ്പെടുത്തിയും ആ ഹറാമിലൂടെ സമ്പാദ്യങ്ങൾ പെറ്റുപെരുകുകയും ചെയ്യുമ്പോൾ പിന്നെങ്ങനെ നാം നീട്ടുന്ന കൈകൾക്ക് തമ്പുരാന്റെ ഉത്തരം ലഭിക്കും? *

       ഇവിടെ സ്മരിക്കപ്പെടേണ്ടത് തൊഴിലാളിയുമായി ബന്ധപ്പെട്ട അവകാശമാണ്. അതൊരു സാമൂഹ്യ സിമ്പലാണ്. അതുപോലെ തന്നെ സമൂഹത്തിലെ നാനാതുറകളിലും പെട്ട ജനവിഭാഗങ്ങളുടെ അവകാശമൊക്കെ ഈ പരിധിയിൽ വരും.

     *പ്രാർഥനയോടെ അല്ലാഹുവിലേക്ക് കൂടുതൽ അടുക്കേണ്ട സമയമാണിപ്പോൾ. എന്നാൽ നമ്മുടെ പ്രാർഥനക്ക് മാറ്റുകൂട്ടാനുള്ള സൽകർമം നമ്മുടെ കയ്യിലുണ്ടാവണം. നമ്മൾ ചെയ്ത സത്കർമങ്ങൾ ഉയർത്തിക്കാട്ടി അല്ലാഹുവോട് കയ്യുയർത്താൻ നമുക്ക് കഴിയണം. ജീവിതത്തിൽ സൂക്ഷമത പാലിച്ചു തഖ്‌വയിലധിഷ്ഠിതമായ ജീവിതം നയിച്ച് വേണം നാം നാഥനിലേക്കടുക്കാൻ. ഭക്തിയും വിശ്വാസവും സമർപണ ബോധവുമില്ലാത്ത പ്രാർഥന ചൈതന്യരഹിതമായിരിക്കും. ആത്മാവില്ലാത്ത വെറും തേട്ടങ്ങൾ മാത്രമായി അത് മാറും. *

        നാമിപ്പോൾ ഒരു ആപത്ഘട്ടത്തിലാണ്. പ്രാർത്ഥനയിൽ അല്ലാഹുവിനു കാണിക്കയായി സമർപിക്കാൻ ഏറ്റവും മഹത്തായ ഒരു സുകൃതം, ഒരു നന്മ നാം കരുതിവെക്കുക. *കരുതിവെക്കാൻ സുകൃതവും നന്മയുമില്ലാത്ത ജീവിതം കൊണ്ട് നാമെന്താണ് നേടുക?*

✍ഹുസൈൻ തങ്ങൾ വാടാനപ്പള്ളി
*----------------------------*