🥀അല്ലാഹുവിനെ ഭയക്കണം

💠നീ എന്തിനാണ് കരയുന്നത്?-63

✍ അബൂബക്കര്‍  അഹ്‌സനി പറപ്പൂർ.

ഫത്ത്ഹുല്‍ മൗസിലി എന്ന മഹാന്റെ ശിഷ്യന്‍ അദ്ദേഹത്തിന് ഉസ്താദുമായിട്ടുണ്ടായ ഒരനുഭവം വിവരിക്കുന്നുണ്ട്. അതിങ്ങനെയാണ്:

'ഒരിക്കല്‍ ഞാന്‍ ഉസ്താദിനെ കാണാനായി  ചെന്നപ്പോള്‍ അദ്ദേഹം കരയുകയായിരുന്നു. സൂക്ഷിച്ചു നോക്കിയപ്പോള്‍ അദ്ദേഹത്തിന്റെ കണ്ണുകളില്‍ നിന്നൊഴുകുന്ന കണ്ണുനീരിനൊപ്പം മറ്റെന്തോ കലര്‍ന്നതായിട്ട് ഞാന്‍ ശ്രദ്ധിച്ചു. രക്തമാണതെന്ന് ഞാനുറപ്പിച്ചു. ഞാന്‍ ഉസ്താദിനോട് ചോദിച്ചു:

'അല്ലാഹുവിനെ സത്യം ചെയ്തു ഞാന്‍ പറയുന്നു നിങ്ങള്‍ രക്തമൊഴുക്കി കരയാറില്ലേ?!'

ഞാന്‍ അല്ലാഹുവിനെ തൊട്ട് സത്യം ചെയ്ത് പറഞ്ഞപ്പോള്‍ ഉസ്താദ് എന്നോട് പറഞ്ഞു:

' അല്ലാഹുവിനെ തൊട്ട് നിങ്ങള്‍ സത്യം ചെയ്തത് കൊണ്ട് മാത്രം ഞാന്‍ പറയുന്നു. അല്ലായിരുന്നുവെങ്കില്‍ ഞാനൊരിക്കലും പറയാനാഗ്രഹിക്കാത്ത എന്റെ രഹസ്യമാണിത്. അഥവാ ഞാന്‍ കണ്ണുനീരൊഴുക്കിയും കരയാറുണ്ട്, രക്തമൊഴുക്കിയും കരയാറുണ്ട്'

ഇതു കേട്ടപ്പോള്‍ ഞാന്‍ ആശ്ചര്യത്തോടെ ചോദിച്ചു;

'നിങ്ങളെന്തിനാണ് കണ്ണുനീര്‍പൊയ്ച്ച് കരഞ്ഞത്? '

ചോദ്യം കേട്ടയുടനെ സങ്കടം നിറഞ്ഞ കണ്ണുകളുമായി ഉസ്താദ് പറഞ്ഞു:

'അല്ലാഹു പറഞ്ഞതു പോലെയൊന്നും എനിക്ക് ജീവിക്കാനായില്ലല്ലോ?! അതാലോചിച്ചാണ് ഞാന്‍ കണ്ണീര്‍പൊഴിച്ചത്.'

'അങ്ങനെയെങ്കില്‍ നിങ്ങള്‍ രക്തം പൊഴിച്ച് കരഞ്ഞതെന്തിനാണ്? '

ഞാന്‍ വീണ്ടും ആകാംഷയോടെ ചോദിച്ചു.

ചോദ്യം കേട്ട ഉസ്താദ് പറഞ്ഞു:

'അത് ഞാനൊഴുക്കിയ കണ്ണുനീര്‍ അല്ലാഹു സ്വീകരിക്കുമോ ഇല്ലയോ എന്ന് ഭയന്നിട്ടാണ് ഞാന്‍ രക്തംപൊഴിച്ച് കരഞ്ഞത്.'

അങ്ങനെ ഉസ്താദവര്‍കള്‍ വഫാത്തായപ്പോള്‍ അദ്ദേഹത്തെ ഞാന്‍ സ്വപ്‌നത്തില്‍ ദര്‍ശിച്ചു. ഞാന്‍ ചോദിച്ചു:

'അങ്ങയെ കൊണ്ട് അല്ലാഹു എന്താണ് ചെയ്തത്? '

അപ്പോള്‍ ഫത്ത്ഹുല്‍ മൗസിലിയെന്ന എന്റെ ഉസ്താദ് പറഞ്ഞു:

'അല്ലാഹു എനിക്ക് പൊറുത്ത് തന്നു. അവന്‍ എന്നെ അവന്റെ ഇഷ്ടക്കാരുടെ കൂട്ടത്തില്‍ ഉള്‍പ്പെടുത്തിയിരിക്കുന്നു. ഉസ്താദ് തുടര്‍ന്ന് പറഞ്ഞു:

'നീ ചോദിച്ച അതേ ചോദ്യം അല്ലാഹു എന്നോട് ചോദിച്ചു അഥവാ 'നീ എന്തിനാണ് കണ്ണുനീര്‍ പൊഴ്ച്ച് കരഞ്ഞതെന്ന്'

ഞാന്‍ അല്ലാഹുവിനോട് പറഞ്ഞു:

'അത് റബ്ബേ, നിന്നെ തൊട്ട് ഞാന്‍ പിന്തിയതില്‍ പേടിച്ചു കരഞ്ഞതാണ്.'

 ഉടനെ അല്ലാഹുവിന്റെ ചോദ്യമെത്തി:

' അപ്പോള്‍ നീ എന്തിനാണ് രക്തം പൊഴ്ച്ച് കരഞ്ഞത്? '

'അത് റബ്ബേ, എന്റെ കണ്ണുനീര്‍ നീ സ്വീകരിക്കില്ലേ എന്ന് ഭയപ്പെട്ട് കൊണ്ടാണ് ഞാന്‍ കരഞ്ഞത്.'

 അപ്പോള്‍ അല്ലാഹു തആല എന്നോട് തിരിച്ചു  പറഞ്ഞു : കഴിഞ്ഞ നാല്‍പത് വര്‍ഷമായി നിങ്ങളുടെ സംരക്ഷകരായ ഹഫ്‌ളത്തിന്റെ മാലാകമാര്‍ നിങ്ങളുടെ പ്രവര്‍ത്തന രേഖകളുമായി എന്റെ അടുത്തു വരുന്നു. അതിലൊന്നും ഞാന്‍ ഒരൊറ്റ തെറ്റു കുറ്റങ്ങളും കണ്ടിട്ടില്ലല്ലോ.

حكى- عن بعض أصحاب فتح الموصلي قدس سره قال دخلت يوما على فتح فوجدته يبكى وقد خالطت دموعه صفرة فقلت له بالله عليك يا سيدى هل بكيت الدم فقال والله لولا انك أقسمت على بالله عز وجل ما أخبرتك *بكيت الدمع وبكيت الدم* فقلت علام بكيت الدمع قال على تخلفى عن الله تعالى فعلام بكيت الدم قال على الدموع ان لا تصح لى ان لا تقبل منى قال فلما توفى رأيته فى المنام فقلت ما فعل الله بك قال غفر لى وقربنى ربى وقال يا فتح بكيت كل هذا البكاء على ماذا فقلت يا رب على تخلفى عن حقك قال والدم لم بكيته قلت يا رب على الدموع ان لا تصح لى قال يا فتح فما أردت بهذا كله وعزتى وجلالى لقد صعد الىّ حافظاك أربعين سنة بصحيفتك وما
فيها خطيئة فهذه حال أكابر اولياء الله تعالى يسيئون الظن بانفسهم ويجتهدون فى الله وان علموا العفو والمغفرة
[إسماعيل حقي ,روح البيان ,3/503]

وان اخلاص النية وتفويض الأمور الى الله تعالى سبب لرحمة الله تعالى وان البكاء ايضا مدار لقبول التوبة واخلاص الحال *فلا بد من الاستغفار والبكاء على الأوزار*
[إسماعيل حقي ,روح البيان ,3/503]


🔅🔅🔅
*ഗുണപാഠം:*
അല്ലാഹുവിനെ ഭയക്കണം. ഒരു ഭീകര സ്വത്വത്തെ ഭയപ്പെടുന്ന പോലെയല്ല. *ഏറ്റവും കൂടുതല്‍ സ്‌നേഹിച്ചവരോട് നാം തെറ്റ് ചെയ്താല്‍ നമ്മുടെ ഉള്ളിലുണ്ടാകുന്ന ഒരു പ്രത്യേകതരം പശ്ചാതാപമുണ്ടല്ലോ? ജീവിതകാലത്തൊരിക്കലും നമുക്ക് മറക്കാന്‍ സാധിക്കാത്ത ഒരു മനോവേദന, അവരോട് ഞാന്‍ ചെയ്തതെങ്ങാനും അവരറിഞ്ഞാല്‍ എന്ന ഒരുള്‍ഭയം ആ ഭയത്തിന്റെ ഏറ്റവും മൂര്‍ദ്ധന്യമായ രൂപമാണ് അല്ലാഹുവിനോട് വേണ്ടത്. കാരണം അവന്‍ നമ്മളെ സ്‌നേഹിക്കുന്നതിന്റെ അളവെടുക്കാന്‍ ഈ ലോകത്ത് ഒരു മെഷര്‍മെന്റും കണ്ടെത്തിയിട്ടില്ല.*

എന്താണ് പ്രിയപ്പെട്ടവരോട് നാം തെറ്റു ചെയ്യുകയും അതവരറിയുകയും ചെയ്താല്‍ പൊതുവെ ചെയ്യാറുള്ളത്?! അവരുടെ തൃപ്തി കരസ്തമാക്കാനും അവരുടെ മനസ്സില്‍ വീണ്ടും കയറിക്കൂടാനും അവരോട് ക്ഷമ ചോദിച്ചും അവര്‍ക്ക് വേണ്ടത് ചെയ്തു കൊടുത്തും കൂടെ കൂടും. അതുപോലെ ചെയ്തു പോയ തെറ്റോര്‍ത്ത് റബ്ബിനോട് ഇസ്തിഗ്ഫാറിനെ തേടുക. *കാരണം നമ്മളെ ഏറ്റവും കൂടുതല്‍ സ്‌നേഹിക്കുന്ന അവന്‍ പൊറുത്ത് തരാതിരിക്കില്ല.*

 *Note :*
( പംക്തിയിൽ പറയപ്പെടുന്ന എല്ലാ ചരിത്രങ്ങളും മൂലഭാഷയുടെ പദാനുപദ വിവർത്തനമാകണമെന്നില്ല. മറിച്ച്, ചിലത് ആഖ്യായിക രൂപേണ; വായനക്കുതകും രീതിയിലാണ് അവതരിപ്പിക്കുക)
➖➖➖
©Copy Right:
*URAVA PUBLICATIONS*
Swalath Nagar, Malappuram,
*----------------------------*